سألت عن السعاده
ومشيت أدور عليها
ومشيت أدور عليها
في الدنيا وبين الناس
قالو السعادة في الفلوس
في القصور والدهب والماس
وجريت أجمع في الفلوس
لكنى لقيت إحساس
إن السعادة مش في الفلوس
ولا في الدهب والماس
سألت تاني
قالو السعادة في النساء
فى سهرة حمرا و متعة وكاس
وقابلت في الدنيا ناس
أدمنوا الزنا والسهر والكاس
لقيت يا حسرة عليهم
هما ياناس أتعس ناس
وقابلت راجل حكيم
قلتلوا يا عم كل الناس
دلنى على السعادة
نورنى دنا محتاس
سكت شوية وبصلي وقالي
السعادة يابنى في راحة البال
في لقمة تاكلها من حلال
فى فرحة تدخلها على أولادك
ومراتك أم العيال
فصدقة تديها في خفى
لمسكين فقير ماعنده مال
فى صلاة بخشوع لربك
تبكى وتشكى اليه الحال
وخليك ديما مستقيم
وطهر قلبك من الأرزال
هتلاقى السعادة تندهلك
وتجيلك من غير سؤال
قلتلوا كتر خيرك
ويصلح ليا وليك الحال
ريحتنى
ربي يريح قلبك
ويديك ويديني راحة البال
ليست هناك تعليقات:
إرسال تعليق