صعبه الرحلة

صعبه الرحله من غير خل
من غير حد
وانا عمري ماشلت الكره لحد
ولا القسوه
ولا مستني شكل الغد
انا القلب اللي كان أبيض
ولا اسودش في يوم من حد
انا الآهه اللي تنخر في الحيطان بدون هدم
انا الصخره
انا الصخره اللي أتقل من حمول الصبر
انا الصابر
وريقي أمر من العلقم
وروحي أخف من ظلي
ومال الدنيا ومال حالي
أنا السائل عن الاحساس
ويفتكروني ما بحسش
ولايعطف على حالي
تقيله الكلمه
بس أخف من حزني وأحمالي
ولا عندي ميراث والدي
ولا عندي كنوز هارون
ولا باتقن فنون النصب
انا الزاهد لكن بالغصب
انا السواح فى عز الليل
في عيني بتنطفي القناديل
بقلمي بكتب لكل عاشق وكل حزين
عصايتي واخده من عودي صلابتها
أصيله وعندها اخلاص
ولا توقعني في الخيه
ولا تخونني وتتحول تكون حيه 
انا السواح وعمري ما أخاف
كلاب السكه أصحابي
وعارفيني من الخطوه
بلاقي نوحي في نباحهم
واجمع عيشي مع عيشهم
وافرش خيشي على خيشهم
وارجع تاني للدايره
وأستجدي في عطف القاعده والسايره
ويكسفني اللي يكسفني
ولا بقدر أحاسبهم
ولا بامشي في مواكبهم
ولا تصيدني شباك الهم
غير من فوق مراكبهم
وجيت اليوم بناشدكم
وقلبي دقته احزان
وحلم امبارح الماثل أمام عيني
بيالمني
وجدت نهايه للدايره
وشفت نهايه زي الموت
وهربت مني تجاعيدي
وجوف قلبي ملاه الحزن
ملاه القهر
وجاتني عديتي بالامر
جاتني عديتي أنهار
يا أنهار العسل والخمر

بطعم المر
ووسط التوهه والملكوت
حلمت بقصر عليه اسمي
ومتزخرف بروح رسام
صحيح الحلم بينسي
شقى الايام واذلالها وحوجتها
معادتشي على بالي
ولا كنتش على بالها
وبتعدي بتفاهتها وبهبلها
ولا بقدر أعاتبها
وانا موصول بعتبتها
وانا واقف على بابكم
ومش شايف شعاع الشمس دا النازل
وبيغازل سمار الوش
ومش هاخجل أنا منكم
وهاطلب منكم الحسنه
دا انا من ساعة أما فقت من حلمي
وأنا عايش كده في حسره
عشان نفسي أجيب حتة قماش ساده
بلون أبيض
واعمل بيها لبس جديد
ميشبهشي ملابسكم
ولا ينفع يناسبكم
عشان عيدي اللي عمره ما جه في تفكيركم
عشان عيدي اللي عمره ما كان في يوم عيدكم

خلاص الدنيا وخداني وحطاني

في قلب الدايره